Klaskit ar wirionez / Cherchez la vérité

   «Klaskit ar wirionez ma fell deoc’h beza prest ’vel eun tamm douar mad da zigemer an had !» An diskan-se, ‘vid eur c’hantik kanet gand bugale diwar-benn parabolenn an had, am-eus skrivet ouspenn tregont vloaz ’zo, ha d’ar poent-se ne zonjen ket e vefe red deom eun deiz klask ar wirionez e-touez ar pez a vez kontet deom. Gwir eo n’e-noa ket ar bed gouzañvet c’hoaz ar mestr da liva gevier, Donald Trump. Kement e-neus falset ar wirionez, beteg nac’h ar pez a zo anad koulskoude, da skwer ar cheñchamant hin hag a ra e reuz da vad en e vro, m’e-neus hadet douetañs evid pep tra. Soñj on-eus oll euz an doare m’e-neus kaset e dud da sailla war ar C’hapitol gand nerz e falsentez. Siwaz n’eo ket an diskibien a vank dezañ, ha da genta Jaïr Bolsonaro, ha na ped ha ped rener all, hag en deveziou-mañ Loukachenko er Belarus, a implij repuidi evid taga Europa hag he drougtunia gand ar gaz... Pa zeu an douetañs d’en em zila e pep lec’h, penaoz kaoud fiziañs c’hoaz ? War betra pe war biou fizioud ? Klaskit ar wirionez...   Lavaret e vez o-deus on tadou bevet e-pad kantvejou gand aon euz an ifern, ha kement-se eo a lake anezo da zenti ouz an Iliz. Gwir pe get, kement-se ne vire ket ouz kalz anezo da veva eur feiz gwirion ha da gonta war madelez an Aotrou Doue. An aon wirion a zo dirazom hirio, ha na c’hell ket kén beza kuzet, eo an hini a zeu euz ar cheñchamant hin : e reuz a ra dija e meur a lec’h. Gouzoud a reom ive tamm pe damm penaoz tala ouz ar gwall-daoliou a zo da zond, ma kemerom an hent mad hirio. Ar re yaouank o-deus komprenet mad ema o buez da zond etre daouarn ar vistri a-hirio, ha ne fell ket dezo e kouezfe an oll zrougou warno : felloud a ra dezo beva ! Na lakom ket eun ivern nevez, digoret dezañ an nor gand on tadou ha ganeom-ni ive abaoe an 19ved kantved, da goueza war o chouk ’vel ma ne vefe ket anezañ. Diwezad eo dija evid toulla eun hent nevez, med red eo hen ober, ha kement-se a zell ouz pep hini, rag pep hini a zo gouest da ober eun dra bennag war an dachenn-ze. Kredom da vad e bolontez beva ar re yaouank ha ganto kemerom eun hent a wirionez.ALLER CHERCHER LA VERITE

   « cherchez la vérité si vous voulez être prêts comme un peu de bonne terre à accueillir le grain ! « Ce refrain; je l’ai écrit il y a plus de trente ans pour un cantique chanté par des enfants au sujet de la parabole de la semence, et à l’époque je n’imaginais pas qu’il nous faudrait un jour chercher la vérité parmi tout ce qui nous est raconté. Il est vrai que le monde n’avait pas encore eu à subir le maître du mensonge, Donald Trump. Il a tellement faussé la vérité, jusqu’à nier ce qui est pourtant évident, par exemple le changement climatique qui sévit fortement dans son pays, qu’il a semé le doute pour tout. Nous nous souvenons tous de la manière dont il a amené ses gens à l’assaut du Capitole par la force de sa fausseté. Malheureusement ce ne sont pas les disciples qui lui manquent à commencer par JaÏr Bolsonaro et combien d’autre dirigeants, et ces jours-ci Loukachenko en Biélarussie, qui utilise des réfugiés pour attaquer l’Europe et la faire chanter par le gaz... Quand le doute s’insinue en tout lieu, comment avoir encore confiance ? A quoi ou à qui se fier ? Cherchez la vérité...

   On dit que nos pères ont vécu pendant des siècles sous la peur de l’enfer, et que c’est cela qui les amenait à obéir à l’Eglise. Vrai ou faux, cela n’empêchait pas beaucoup d’entre eux de vivre une vraie foi et de compter sur la bonté de Dieu. La peur réelle qui est devant nous aujourd’hui, et qui ne peut plus être cachée, est celle qui provient du changement de climat ; il accomplit déjà ses ravages en bien des endroits. Nous savons aussi plus ou moins comment affronter les catastrophes à venir, si nous prenons les bons chemins aujourd’hui. Les jeunes ont bien compris que leur vie à venir se trouve entre les mains des dirigeants d’aujourd’hui, et ils ne veulent pas que tous les maux retombent sur eux : ils veulent vivre ! Ne faisons pas retomber sur leurs épaules un nouvel enfer, dont les portes ont été ouvertes par nos pères et par nous-mêmes depuis le XIXème siècle... comme s’il n’avait pas existé. Il est déjà bien tard pour ouvrir un nouveau chemin, mais il faut le faire, et cela regarde chacun, car chacun en ce domaine est capable de faire quelque chose. Croyons réellement en la volonté de vivre des jeunes et avec eux prenons un chemin de vérité.

Job an Irien d'ar 19 a viz du / le 19 novembre.